"Шеффилд Юнайтед" Англия Премьер-лигасида навбатдаги антирекордни ўрнатди.
Шанба куни жамоа чемпионат аутсайдерлари ўртасидаги ўйинда "Бёрнли"га йирик ҳисобда мағлубиятга учради (1:4). "Шеффилд Юнайтед" жорий мавсумда ўз уйида аллақачон 51 та гол ўтказиб юборган - илгари ҳеч бир жамоа Премьер-лиганинг бир мавсумида ўз уйида 50 ёки ундан ортиқ гол ўтказиб юбормаган, деб хабар беради Squawka. Англия олий дивизионининг бутун тарихида фақат "Астон Вилла" 1935/36 йилги мавсумда уй ўйинларида янада ёмонроқ ўйин кўрсатиб, рақибларига 56 марта гол уриш имконини берган.
"Шеффилд Юнайтед" 33 ўйиндан сўнг 16 очко билан турнир жадвалида охирги ўринда бормоқда.
