"Милан" имкон қадар тезроқ Оливье Жируни ўрнига ҳужумчи олиб келиш масаласини ҳал қилишни режалаштирмоқда.
Ишончли манбаларнинг хабар беришича, 37 ёшли франциялик футболчи “россонерилар”ни тарк этади ва эркин агент сифатида "Лос-Анжелес"га ўтади. Хабарингиз бор, “Болонья”да тўп тепаётган Жошуа Зиркзее Жиру ўрнини эгаллашнинг устувор вариантларидан бири сифатида белгиланган эди.
GFFN хабарига кўра, "Милан" раҳбарияти яқин орада "Болонья" билан нидерландиялик футболчининг трансфери шартлари бўйича келишувга эришишни кутмоқда. Келишув бўйича тезда келишиб олиш истаги 22 ёшли ўйинчига Премьер-лига клубларидан қизиқишнинг ортиши билан боғлиқ.
Transfermarkt портали Жошуа Зиркзеенинг нархини 40 миллион еврога баҳоламоқда. Футболчи жорий А Сериянинг 31 ўйинида 11 гол ва 5 голли узатмага муаллифлик қилган.
