"Бавария" ҳужумчиси Харри Кейн Англия терма жамоаси сафидаги навбатдаги голини нишонлади. 30 ёшли футболчи бугун Босния ва Герцеговина миллий терма жамоасига қарши кечган ўртоқлик учрашувининг 61-дақиқасида захирадан майдонга тушди ва 89-дақиқада якуний голни урди – 3:0.
Журналист Уилл Жанс таъкидлаганидек, Кейн терма жамоадаги голлари сони бўйича иккита ажойиб собиқ ҳужумчи Роналдо ва Златан Ибраҳимовичдан ўзиб кетди.
Улар Бразилия ва Швеция терма жамоалари учун 62 та гол урган бўлса, инглиз футболчисида энди 63 та гол бор. Англия терма жамоаси навбатдаги ўртоқлик учрашувини 7 июнь куни Исландияга қарши ўтказади.
