Суперлига 5-туридан ўрин олган "Металлург" – "Олимпик" (1:4) учрашувидан сўнг мезбонлар мураббийи Илёс Қурбонов ўз фикрларини билдириб ўтди.

"Биринчи даврани охирида барча футболчимизда чарчоқ сезилди. "Насаф" билан беллашувдан сўнг тиклана олмадик. Қўшимчасига, тезкор иккита гол ўтказиб юбордик. Ўйинга гол уриб қайтдик, аммо рақиб жавоб берди. Тезкор голлар режаларимизни бузиб юборди. Тан олиш лозим, рақиб бугун ҳар жабҳада устун эди. Ўтган сафар айтганимдек, бизга сўнгги нуқтани қўядиган сифатли ҳужумчи етишмаяпти. Яратган вазиятларимизни голга айлантирганимизда, ҳаммаси бошқча бўлиши мумкин эди.

Биз "Сурхон" ва "Насаф"га қарши ҳимоядан туриб қарши ҳужумга ўтиш режаси асосида тўп тепган ва бу иш берган эди. Бугун 3 очко учун ҳаракат қилган эдик. Шу боис, юқорироқда ҳаракат қилдик. Рақиб жуда кўп имкониятга эга бўлди. Йигитлардаги чарчоқ таъсир қилди.

Иккинчи даврада вариантлар бор. Ҳали, аниқлаштирганимиз йўқ. Шунга қарамай, ўйлашимча янги футболчилар олиб келинади. Ҳозирча, бор эътиборимиз кубокдаги "Сурхон" билан ўйинга қаратилган. Ўша баҳсдан сўнг, бу саволга аниқ жавоб беришимиз мумкин", - деди Қурбонов.