Европа чемпионати 1/4 финалида Португалия терма жамоаси Франция термаси билан учрашди. Учрашувнинг ўйин вақти 0:0 ҳисобида дуранг билан якунланди. Ярим финал йўлланмаси тақдири пенальтилар сериясида ҳал бўлди, унда "уч ранглилар" омадли чиқишди - 5:3.
Сўнгги ўйинда 39 ёшли ҳужумчи Криштиану Роналду иштирок этди. У тўлиқ 120 дақиқа ўйнади ва пенальтидан берган зарбасини голга айлантирди. Мағлубиятдан сўнг ҳужумчи сукут сақламоқда. У ўз ижтимоий тармоқларида пост қолдирмади ва ҳеч нарса нашр этмади. Евро-2024да Криштиану бешта ўйин ўтказиб, фақат битта голли узатмани амалга оширди.
