“Сўғдиёна” – “Нефтчи” ўйинидан кейин бош мураббийлар ўз фикрлари билан ўртоқлашишди.

«Нефтчи» жамоаси бош мураббийи Ю.Саркисян:
— биз бугун ёмон ўнамадик. Биринчи бўлимда гол урдик. Лекин ҳакамни тушунолмадим. Рақиб бизнинг кўплаб ҳужумларимизни қўполлик билан тўхтатиб қолди. Деярли жамоанинг ярмини майдондан четлатиши лозим эди. Лекин ҳакам уларни огоҳлантирмади ҳам. 1:1 бўлиб турган вазиятда соф 11 метрлик жаримани бермай, рақибнинг қарши хужумини гол билан якунланишига сабабчи бўлди. Ўйин тақдирини фақат ҳакамлар ҳал қилар экан, бизлар эса ҳеч нима қила олмас эканмиз. Мен улар ҳақида гапираверишдан чарчадим. Бошқа гапим ҳам қолмаяпти. Ҳакамлар бугун ўз билганларини қилишди. Улар қилмишларига жавоб беришадимикан? Йўқ, фақатгина мураббийлар, футболчилар ҳар доим жазоланишади.
 
— Шогирдларингизни ўйинида кўнглингиз тўлдими?
— Ҳа, йигитлар яхши ҳаракат қилишди. 90 дақиқа яхши ўнашди дея олмайман. Кўплаб голли вазиятларни кўкка совуришди. Нима қилардик, футболда нақл бор: «Сен урмасанг, сенга уришади».
 
— «Сўғдиёна» ва «Нефтчи» ўртасидаги учрашувлар азалдан жуда қизиқарли баҳсларга бой бўлган. Бугунги ўйиннинг савияси сизнингча қандай бўлди (ҳакамларни инобатга олмасак)?
— Бугун ҳақиқатдан ҳам 90 дақиқа давомида жанговор ўйин бўлди. Ушбу жамоаларнинг ёшлари ўртасидаги баҳсда ҳам биз олдинда эдик ва қолган дақиқаларда дарвозамиздан икки тўп олиб чиқишга мажбўр булдик. Бугунги ўйин сценарийси ҳам шунга ўхшаш бўлди.
 
— Жамоангизда қайси ўйинчиларнинг ҳаракатидан қониқмадингиз?
— Ҳимоямизнинг иккита болаларча йўл қўйган хатолари натижасида гол ўтказдик. Ҳимоямиз қўпол ҳатоларга йўл қўйди.
 
— Отабек Зокиров захирадан майдонга тушди ва у 10 дақиқа ҳам ўйнашга улгурмади. Бирон сабаб бўлдими унинг алмаштирилишига?
—У ҳали ёш футболчи. Отабек ўйинга киришиб кета олмади. Юқоридан келадиган тўплар учун курашда хатоларга йўл қўяверди. Натижада уни алмаштиришга мажбур бўлдим.