Ўзбекистонлик дзюдочи Диёра Келдиёрова (52 кг) Париж Олимпиадаси ғолибига айланганидан сўнг фикрлари билан ўртоқлашди.
"Бу мусобақага узоқ муддат тайёрландик. Ҳар бир рақибим кучли бўлишини билган эдим. Кучлиларни ютмагунимча, кучли бўла олмаслигимни яхши тушуниб турган эдим. Албатта, ортимда бутун Ўзбек халқи, ўзбекистонлик аёл дзюдочилар турганини ҳис қилдим.
Фурсатдан фойдаланиб, муҳтарам Президентимизга Ўзбекистонда аёллар спортига қаратилаётган эътибор юзасидан чексиз миннатдорчилик билдираман.
Чет эллик спортчилар ҳам бизга яратилган шароитларга ҳавас қилади. Ўйлайман-ки, мана шундай эътибор бугунги Олимпиада ғолиблигининг меваси бўлди", дея Париж-2024 расмий матбуот анжуманида ўз фикрларини билдирди Келдиёрова.
