Бокс бўйича 80 кг. вазн тоифасида олимпиадада дебют қилган Тўрабек Ҳабибуллаев чорак финалда яна бир кучли рақибга қарши жанг қилди. Ҳамюртимизга икки карра олимпиада чемпиони — кубалик Арлен Лопес рақиблик қилди.

Тўрабек баҳс бошиданоқ тажовузкор услубда жанг қила бошлади. Аммо негадир ҳакамларнинг 3 нафари устунликни биринчи бўлимда Лопесга берди.

Арлен иккинчи бўлимда бироз ўзига келди ва тажрибаси эвазига кичик устунликка эга бўлди. Сўнгги бўлим олдидан кубалик спортчи 2:1 ҳисобида олдинда эди.

Ҳабибуллаев ғалаба қозониши учун учинчи бўлимда барча ҳакамларнинг овозини олиши талаб этиларди. Ватандошимиз аниқ зарбалари эвазига Арлен Лопесни қийин аҳволга солиб қўйди. Аммо 2 ҳакам сўнгги бўлим учун устунликни рақибга берди. Якуний баҳолар — 2:3 (28-29, 27-30, 28-29, 29:28, 30-27).

Шу тариқа, ҳакамларнинг бироз тушунарсиз баҳолари эвазига ёш боксчимиз олимпиадани тарк этди.