Boks bo‘yicha 80 kg. vazn toifasida olimpiadada debyut qilgan To‘rabek Habibullayev chorak finalda yana bir kuchli raqibga qarshi jang qildi. Hamyurtimizga ikki karra olimpiada chempioni — kubalik Arlen Lopes raqiblik qildi.

To‘rabek bahs boshidanoq tajovuzkor uslubda jang qila boshladi. Ammo negadir hakamlarning 3 nafari ustunlikni birinchi bo‘limda Lopesga berdi.

Arlen ikkinchi bo‘limda biroz o‘ziga keldi va tajribasi evaziga kichik ustunlikka ega bo‘ldi. So‘nggi bo‘lim oldidan kubalik sportchi 2:1 hisobida oldinda edi.

Habibullayev g‘alaba qozonishi uchun uchinchi bo‘limda barcha hakamlarning ovozini olishi talab etilardi. Vatandoshimiz aniq zarbalari evaziga Arlen Lopesni qiyin ahvolga solib qo‘ydi. Ammo 2 hakam so‘nggi bo‘lim uchun ustunlikni raqibga berdi. Yakuniy baholar — 2:3 (28-29, 27-30, 28-29, 29:28, 30-27).

Shu tariqa, hakamlarning biroz tushunarsiz baholari evaziga yosh bokschimiz olimpiadani tark etdi.