"Манчестер Сити" 19 ёшли форвард Дайвин Мубама билан шартнома имзолайди.
City Xtra хабарига кўра, "шаҳарликлар" футболчини эркин агент сифатида сотиб олиш бўйича келишувга эришган. Мубама ёз бошида шартномаси тугагач, "Вест Хэм"ни тарк этди. Аввалроқ у фаолиятини кучлироқ клубда давом эттирмоқчи бўлгани учун уни янгилашдан бош тортганди.
Қайд этилишича, Стратфорд клуби футболчининг машғулотлари учун компенсация олиш ҳуқуқига эга. Инсайдер Фабрицио Романонинг сўзларига кўра, тўлов 1,2 миллион фунтни ташкил қилади.
Яқин орада футболчи тиббий кўрикдан ўтиши ва "Сити" билан узоқ муддатли шартнома имзолаши керак. У асосан 21 ёшгача бўлганлар жамоасида, балки вақти-вақти билан Пеп Гвардиола қўл остидаги асосий жамоада машғулотлар ўтказиши кутилмоқда.
