"Manchester Siti" 19 yoshli forvard Dayvin Mubama bilan shartnoma imzolaydi.
City Xtra xabariga ko‘ra, "shaharliklar" futbolchini erkin agent sifatida sotib olish bo‘yicha kelishuvga erishgan. Mubama yoz boshida shartnomasi tugagach, "Vest Xem"ni tark etdi. Avvalroq u faoliyatini kuchliroq klubda davom ettirmoqchi bo‘lgani uchun uni yangilashdan bosh tortgandi.
Qayd etilishicha, Stratford klubi futbolchining mashg‘ulotlari uchun kompensasiya olish huquqiga ega. Insayder Fabrisio Romanoning so‘zlariga ko‘ra, to‘lov 1,2 million funtni tashkil qiladi.
Yaqin orada futbolchi tibbiy ko‘rikdan o‘tishi va "Siti" bilan uzoq muddatli shartnoma imzolashi kerak. U asosan 21 yoshgacha bo‘lganlar jamoasida, balki vaqti-vaqti bilan Pep Gvardiola qo‘l ostidagi asosiy jamoada mashg‘ulotlar o‘tkazishi kutilmoqda.
