Биринчи лиганинг 5-туридан ўрин олган “Машъал” – “Орол” баҳсидан сўнг меҳмонлар устози Неъматулло Қутибоевнинг фикрлари билан қизиқдик.
- Ўйин давомида “Машъал”нинг бизга нисбатан барибир кучли эканлиги кўриниб турди. Ўтказиб юборилган голларда ўзимиз хатога йўл қўйдик деб ўйлайман. Биз энди-энди ўйинимизни топиб боряпмиз, “Машъал” эса аллақон ўз ўйинини топиб олган ва шунинг учун ҳаммани мағлубиятга учратиб келмоқда. Баъзи сабабларга кўра, бу мавсум бироз кеч йиғилдик. Менимча, шунинг таъсири билиняпти.
- “Орол” Муборакка ўзининг энг кучли таркиби билан ташриф буюрдими?
- Энг кучли таркиб десам ҳам бўлади. Фақат икки нафар ҳимоячимиз майдонга тушмаганини ҳисобга олмаганда.
- Жамоангиз дарвозасига белгиланган пенальти хусусида нима дея оласиз?
- Фикримча, пенальти йўқ эди. Балки ҳакамлар ўша вазиятда адашган бўлишлари мумкин.
- “Орол” кучли саккизликка кира оладими?
- Шогирдларимга ишонаман. Ҳаммаси жойида бўлса кейинги босқичга албатта чиқамиз.
- Нима деб ўйлайсиз, “Машъал” кўрсатаётган ўйини билан олий лигага чиқа оладими?
- Чиқади. Бу ҳақда гап-сўз бўлиши мумкин эмас.
- Жиянингиз Саламат Қутибоевнинг ўйини ҳақида тўхталсангиз.
- Саламатда тажриба бироз камлиги, анчадан бери ўйнамагани кўриниб турибди. Аммо ўйиндан ўйинга савияси ортиб боришига ишонаман.
- Ҳозир Нукусда футболга бўлган эътибор қандай?
- Келинг, шу саволни очиқ қолдирай.
