Осиё чемпионлар лигасининг 5-туридан ўрин олган «Ал-Иттифоқ» ва «Пахтакор» жамоалари ўртасидаги учрашув борасида «Пахтакор» яримҳимоячиси Ғулом Ўрунов ўз фикрларини билдириб ўтди.

«Ҳар икки жамоа баҳсга жиддий тайёргарлик кўрган. Демак, учрашувнинг қизиқарли ўтишини айтиш мумкин. Гуруҳдаги барча жамоада кейинги босқичга чиқиш имконияти сақланиб қолган. Биз Даммамда ғалаба қозониб, ишқибозларимизга хурсандчилик улашишни истаймиз».

«Стадионнинг мухлислар билан тўлиши бизга таъсир қилмайди деб ўйлайман. Футболни мухлислар кўп стадионда ўйнаш осонроқ. Қолаверса, 2009 йил шу ерда «Ал-Иттифоқ»қа қарши майдонга тушганман. Ўшанда ҳам стадион тўла мухлислар бўлганди. Шунга қарамай, 2:1 ҳисобида муваффақиятга эришганмиз», дея Ўруновнинг сўзларидан иқтибос келтирмоқда «Пахтакор» расмий сайти.