Лондоннинг «Челси» клуби ҳужумчиси Фернандо Торрес жамоасига «Атлетико» ҳужумчиси Радамель Фалькаонинг келиши мумкинлиги борасидаги хабарларга ўз муносабатини билдириб ўтди.
«Челси» сафида ўйнар экансан, бу ерга кучли футболчилар олиб келинишини тушунишинг талаб этилади. Бу жараённи тўхтатиб бўлмайди. Айниқса ёзги трансферлар пайтида».
«Шунинг учун ҳам, агар клуб Фалькаони сотиб оладиган бўлса, бу мени ортиқча таажжубга солмайди. Ўзимга келадиган бўлсам, ҳозирча ҳақиқий, энг юқори савиямга чиқдим дея олмайман. Барчаси ҳали олдинда эканига умид қиламан. «Челси» футболчилари ҳали мени энг яхши спорт формамни кўришгани йўқ».
«Премьер-лигада бизга қарши доимий равишда орқа чизиққа асосий эътиборни қаратиб тўп суришмоқда. Бу мен каби футболчилар учун жуда мураккаб. Мата, Оскар ва Азар каби футболчилар учун эса бу айни муддао бўлмоқда».
«Мен шунчаки бунга кўникишим лозим, шу боис, ўйин услубимни ўзгартирмоқчиман. Умид қиламанки, келгуси мавсумда барчаси бунданда яхшироқ кўринишда бўлади. Сабаби, «Челси» раҳбарияти мендан умиди катта. Улар менга, мен эса уларга ишонаман», дея Торреснинг сўзларидан иқтибос келтирмоқда «Goal.com» интернет-нашри.