Ўзбекистон кубоги ярим финал босқичидан ўрин олган «Андижон» - «Сурхон» учрашувидан сўнг термизликлар бош мураббийи Февзи Давлетов матбуот анжуманида иштирок этди.

— Ўйин ҳақида.
— Учрашув давомида ўйин назорати биз томонимизда бўлди. Майдон ҳолати оғир эди, бироқ шундай бўлса ҳам биз вазиятлар яратишга интилдик. Биринчи бўлимда ҳам, иккинчи бўлимда ҳам етарлича имкониятларимиз бўлди. Масалан Асилбек Жумаевнинг вазияти биз учун ижобий тугаганида балки ғалаба қозониб кетишимиз ҳам мумкин эди. Пенальтилар серияси бу - лотерея, омад ким томонда бўлса, ўша ғолиб чиқади.

— Пенальтилар серияси учун дарвозабонни сиз танладингизми?
— Ҳа, икки кун машғулотлар давомида эҳтимолий пенальтилар серияси бўйича ҳам ишладик. Ким тайёр бўлса, ўша футболчига имконият берамиз.

— «Навбаҳор» билан ўйиндан фарқли равишда бугун ротацияларни амалга оширдингиз. Бунинг сабаби нимада?
— Биз дастлаб «Пахтакор» ва кейин «Навбаҳор» билан ўйнадик. Чарчоқлар бўлиши табиий. Позиcиялар бўйича турли футболчиларни синовдан ўтказаяпмиз. «Навбаҳор»га қарши ўйинда у қадар ёрқин ўйнамагандик. Бугунги учрашувда эса мағлубиятга ҳақли эмасдик деб ўйлайман. Шунақаси ҳам бўлиб туради

— Кубок финалида «Андижон» ва «Навбаҳор» ўйнайди, водий дербиси. Бу учрашув ҳақида фикрингиз?
— Кучлиси ғалаба қозонсин.