Марокашда ер юзидаги энг улкан стадион қад кўтаради.

Африкалик араблар ушбу улкан лойиҳа воситасида ЖЧ-2030 финал ўйинини Испаниядан тортиб олишдан умидворлар. Касабланка шаҳрида қуриладиган янги мегастадионнинг номи ҳам тайин - «Ҳасан II».

Ўта дабдабали лойиҳа

Лойиҳа режасига мувофиқ, «Ҳасан II» стадиони 115 минг томошабинни ўз ичига олади. Маълумот учун, ҳозирда Пхень­ян (КХДР)да жойлашган «Биринчи май» стадиони сиғими бўйича жаҳондаги энг каттаси ҳисобланади - 114 минг. Умуман олганда, «Ҳасан II» Марокашда ЖЧ-2030га қаратилган тайёргарлик жараёнининг асосий қисмидир. Марокашликлар ушбу мегалойиҳа ёрдамида мундиал финалини ўтказиш ҳуқуқини қўлга киритмоқчилар. Улар ҳал қилувчи баҳсга янгиланган «Сантьяго Бернабеу» ва «Камп Ноу» («Барселона» стадионидаги реконструкция ишлари кейинги йил давомида якунланиши керак) даъвогар эканлигига қарамай, ҳаракатлари самара келтиришига ишонишмоқда. 

Чодирсимон дизайн

Касабланкадаги стадион лойиҳаси чиндан ҳам дабдабали. «Ҳасан II» дизайни «МЮ»нинг янги стадионини лойиҳалаш учун масъул Populous компаниясига тегишли. Мегалойиҳани амалга ошириш учун 100 гектар ер майдони ажратилган. Яъни янги арена атрофида улкан боғ барпо этилади, яна спорт майдончалари қурилади. Дизайн Марокашнинг анъанавий чодиридан илҳомланган ҳолда ишланган. Арена хавфсизлик ва қулайликнинг энг юқори стандартларига тўлиқ жавоб беради. «Ҳасан II» табиатга ҳурмат билан қарайдиган улкан ҳудудга айланади ва бутун дунё учун очиқ бўлади. Оддий айтганда, янги стадион Марокашга хос буюк меҳмондўст анъаналари тимсолидир», - дея лойиҳага таъриф берди бош дизайнер Тариқ Уалалу. Тўғри, ҳозирча қурилиш муддати аниқ эмас. Марокаш Қироллик футбол федерацияси президенти Фузи Лекжанинг айтишича эса, стадион 2028 йил охиригача қад ростлайди.

ЖЧ-2030 учун яна қайси стадионлар бор?

2030 йилги жаҳон чемпионати нақ 6та мамлакатда меҳмон бўлади. Тўғри, аксарият ўйинлар Испания, Португалия ва Марокашда ўтказилади, фақат дастлабки 3та баҳс Аргентина, Парагвай ва Уругвайда ташкил этилади ЖЧнинг 100 йиллик юбилейи шарафига. Ҳозирда Жанубий Америка томони стадионлар танлови масаласида якуний тўхтамга келмаган. Лекин асосий мезбон мамлакатлар ўйинларни нечтадан стадионда қабул қилиши маълум: Испания - 11та, Марокаш - 6та ва Португалия - 3та. Испанлар эса аллақачон 11та аренани танлаб бўлишган: «Сантьяго Бернабеу» (Мадрид), «Камп Ноу» (Барселона), «Метрополитано» (Мадрид), «RCDE Стэдиум» (Барселона), «Ла Картуха» (Се­вилья), «Сан-Мамес» (Бильбао), «Аноэта» (Сан-Себастьян), «Ла Росаледа» (Малага), «Ромареда» (Сарагоса), «Риасор» (Ла-Корунья), «Гран-Канария» (Лас-Пальмас).

А.АБДУВАЛИХЎЖАЕВ тайёрлади