Уругвай терма жамоаси мухлислари Луис Суареснинг сўнгги ўйинида хайрлашув маросимини уюштиришди.
37 ёшли ҳужумчи терма жамоадаги сўнгги ўйинини ЖЧ-2026 саралаши доирасида Парагвайга қарши (0:0) ўтказди.
Учрашув бошланишидан аввал "Сентенарио" стадионидаги мухлислар "Луис абадий" ёзуви туширилган улкан баннерни осиб, футболчини бутун ўйин давомида қўллаб-қувватлаб туришди. Финал ҳуштаги янграганидан сўнг мухлислар футболчини чиройли тарзда кузатиб қўйишди.
Хайрлашув маросимида терма жамоанинг собиқ бош мураббийи Оскар Табарес ҳамда жамоанинг собиқ сардорлари Диего Лугано, Диего Форлан ва Диего Годинлар иштирок этишди. Стадион экранида Суарес фаолиятидаги бошқа муҳим шахслар пайдо бўлди, улар орасида Лионель Месси ва Неймар ҳам ўзларининг хайрлашиш тилакларини билдиришди.
“Интер Майами” футболчиси халқаро фаолиятини Уругвай терма жамоаси тарихидаги энг яхши тўпурар сифатида якунлади. Унинг ҳисобида 143 та ўйин ва 69 та гол бор.
