“Бунёдкор” – “Поханг Стилерз” учрашуви олдидан ўтказилган матбуот анжуманининг иккинчи қисмида “Поханг Стилерз” вакиллари иштирок этишди.

- Эртанги кун ўйинларидаги энг муҳим баҳс айнан бизнинг учрашувимиз, деган бўлардим. “Бунёдкор” билан бўлган аввалги учрашувларимизнинг ҳеч бири осон кечмаган. Ўйлайманки, эртага ҳам мухлислар шиддатли ва жангавор ўйин гувоҳи бўлишади. Жамоамизда битта жиддий йўқотиш бор. Бу муаммони бошқа ўйинчи орқали ҳал этишга ҳаракат қиламиз. К-лигадаги муваффақиятли иштирокимиз Осиё Чемпионлар лигаси турниридаги ҳаракатларимизга ҳалал бермайди. Аксинча ғолибона руҳ жамоа кайфиятини кўтаради. “Бунёдкор”га қарши айнан мана шундай тактикага асосланган ўйин намойиш этамиз деёлмайман. Барчаси рақибга ва унинг бизга қанчалик имконият беришига боғлиқ. Шунга қарамасдан, кўпроқ ҳужумга ўтишга ҳаракат қиламиз. Чунки гуруҳдан чиқиш учун шунга мажбурмиз. Бироқ ҳимояни ҳам унутмаймиз ва орқа чизиқда ҳам тартибли ўйнашимиз керак. Ўйин олдидан хурсанд қилаётган жиҳат шуки, сўнгги учрашувларда захирада ўтирган футболчиларга кўпроқ имкон бердим ва улар ишончимни оқлашди. Шу боисдан ҳам ўйин олдидан бир қанча футболчилар ичидан энг яхшиларини танлаб оламан. Плей-оффга чиқиш учун бор кучимизни ишга соламиз, - дейди “Поханг Стилерз” бош мураббийи Сун-Хонг Хванг.

“Поханг Стилерз” бош мураббийи матбуот анжуманига ўзи билан бирга ярим ҳимоячи Хванг Жин Сунгни олиб келди.

- Жамоа ичидаги муҳит аъло даражада. Кайфиятлар ҳам жуда яхши. Эртанги баҳсда ғалаба қозониб, турнирдаги иштирокимизни давом эттиришимизни истаймиз. Тошкентдаги баҳсга қуйидагича изоҳ бераман: Ёшларимиз муносиб ўйин намойиш этишди ва “Бунёдкор”дек кучли жамоа майдонидан очко билан қайтди. Балки ўша ўйинга асосий таркиб билан борганимизда уч очко билан қайтармидик....

Мирзаҳаким Тўхтамирзаев
Поханг