"Челси" бош мураббийи Энцо Мареска ўз жамоаси ҳужумчиларининг ўйинига юқори баҳо берди.
Сешанба куни лондонликлар Лига кубогида "Барроу" устидан йирик ҳисобда ғалаба қозонишди (5:0).
Учрашув қаҳрамони хет-трик қайд этган Кристофер Нкунку бўлди. Яқинда Премьер-лигада "Вест Хэм" дарвозасига иккита гол урган Николас Жексон таркибдан четда қолди, Марк Гиу эса захирадан майдонга тушди, аммо гол ура олмади.
"Ўтган мавсум ҳақида гапириш қийин, чунки мен бу ерда бўлмаганман, аммо ҳозир Нкунку ва Жексон фантастик ўйнашмоқда.
Гап нафақат улар урган голларда, балки тўп билан ва тўпсиз қандай ишлаши ҳам муҳим. Гиуга келсак, афсуски, у ҳали гол ура олмади, лекин тез орада бу содир бўлади деган умиддаман", - дея Маресканинг сўзларидан иқтибос келтиради журналист Бобби Винсент.
