Россиялик миллиардер Алишер Усмонов Халқаро қиличбозлик федерацияси (FIE) президенти лавозимига номзод бўлди. FIE раҳбарини сайлаш 30 ноябрь куни Тошкентда бўлиб ўтади.
Усмонов 2008 йилдан буён FIEни бошқариб келаётганди. 2022 йил март ойида у Европа Иттифоқи томонидан унга қарши киритилган санкциялар туфайли ўз ваколатларини тўхтатганди. FIE расмий сайтида берилган маълумотларга кўра, Усмонов номзодини Россия, Беларус, Сербия ва Хитой қатори 103 мамлакатнинг миллий федерациялари кўрсатган ёки қўллаб-қувватлаган. Сайловларда Усмоновнинг ягона рақиби швециялик Отто Дракенберг бўлади. Унинг номзодини фақатгина Швеция қўллаб-қувватламоқда.
FIE раҳбари сайлови 30 ноябрь куни ташкилотнинг Тошкентдаги конгрессида бўлиб ўтади. Айни пайтда Греция вакили Эммануэль Кациадакис халқаро федерация раҳбари вазифасини вақтинча бажариб келмоқда.
