Бугун, 14 май куни ўзбек футболининг ХХ асрдаги энг яхши футболчиларидан бири Биродар Абдураимов 70 ёшга тўлди. Биродар Абдураимовнинг таваллуд аёми муносабати билан у инсон ҳақида ўз билганларимни ёзишни маъқул кўрдим.
Биродар Ҳасанович Абдураимов 1943 йил 14 майда Тошкент шаҳрида таваллуд топган. Ўзбекистонда хизмат кўрсатган спорт устози. «Шухрат» медали соҳиби. «Ўзбекистон ифтихори» кўкрак нишони соҳиби.
Собиқ Иттифоқнинг ўсмирлар, олимпия ва миллий терма жамоаларида ўйнаб, турли мамлакатлар терма жамоалари дарвозасига 23 марта тўп киритган.
Футболчилик фаолиятида Тошкентнинг «Пахтакор», Москванинг «Спартак» ва ЦСКА жамоаларида тўп сурган.
Футболчилик фаолиятидаги шахсий ютуқлари:
«Пахтакор» клубида энг кўп ўйин ўтказган футболчи: 358 ўйин
Собиқ Иттифоқ чемпионатининг энг яхши тўпурари: 1968 йил (22 та гол)
Собиқ Иттифоқ биринчи лигасининг энг яхши тўпурари: 1972 йил (34 та гол)
Григорий Федотов клуби аъзоси: 106 гол
Ўзбекистоннинг турли жамоаларида мураббийлик фаолияти билан шуғулланган. Хусусан, «Шаҳрихончи» (Шаҳрихон), «Динамо» (Самарқанд), «Узумчи» (Булунғур), «Навбаҳор» (Наманган), «Зарафшон» (Навоий), «Сурхон» (Термиз), «Пискент» (Тошкент вилояти), «Умид» (Тошкент) ва «Пахтакор» (Тошкент) жамоаларида бош мураббий бўлиб ишлаган.
1994 йили Ўзбекистон миллий терма жамоасида катта мураббий лавозимида ишлаб Японияда ўтган ХII Осиё ўйинлари чемпиони ва Мустақиллик кубоги мусобақаси ғолиблигини қўлга киритган.
Мен ҳам ўз ўрнида бир гуруҳ мухлислар номидан Биродар Абдураимовнинг 70 йиллик юбилейи билан табриклаймиз. Оиласига тинчлик хотиржамлик, ўзига куч-қувват, соғлик тилаб қоламиз.
Абдумажид Қодиров
