"Барселона" бош мураббийи Ханс-Дитер Флик Испания терма жамоаси Дания ва Швейцария билан бўлиб ўтадиган Миллатлар лигасининг ноябрь ўйинларида "кўк-анорранглилар" вингери Ламин Ямалдан фойдаланмаслигига умид билдирди.
Аввалроқ, 17 ёшли футболчи Чемпионлар лигаси доирасида "Црвена Звезда" билан ўйинда (5:2) тўпиғини жиддий жароҳатлаб олгани ва шу боис Испания чемпионати доирасида "Реал Сосьедад"га (0:1) қарши якшанба кунги ўйинни ўтказиб юборгани маълум бўлганди.
"Менимча, шифокорлар Ламиндан терма жамоада ўйнамасликни сўрашади. Қироллик футбол федерацияси билан гаплашамиз. Агар шундай имконият бўлганида у "Реал Сосьедад"га қарши ўйнаган бўларди, лекин бундай бўлмади. Умид қиламанки, терма жамоа тўғри қарор қабул қилади", - деди Флик Goal билан суҳбатда.
