Бразилиялик аёл футболчи аёлни уриб юборди ва воқеа жойидан қочишга ҳаракат қилди.
CNN Brasil нашри хабарига кўра, "Коринтианс" аёллар жамоаси ҳужумчиси Жаклин Рибейро шанба куни Сан-Паулудаги шифохона яқинида 40 ёшли ҳамширанинг жароҳат олишига сабаб бўлган йўл-транспорт ҳодисасига учради.
Полиция ҳисоботига кўра, футболчининг машинаси бошқа машина билан тўқнашиб кетган, кейин эса аёлга бориб урилган. Жабрланувчи касалхонага ётқизилган, унинг соғлиғи ҳақида маълумот йўқ.
Видеокузатув камераларида Жаклин воқеа жойидан қочишга уринаётгани, бироқ гувоҳлар уни тўхтатиб қолишганини кўриш мумкин. "Маҳаллий аҳоли унинг машинасини тўсиб қўйганидан кейин" у воқеа жойидан 400 метр узоқликда тўхтаган. Рибейро полицияга қўрққанидан дарҳол тўхтамаганини айтди. 24 ёшли футболчи спиртли ичимлик тестини топширди ва у салбий натижа кўрсатди.
Қиз билан суҳбат чоғида полиция ходимлари ҳам мастлик аломатларини сезмаган, бироқ унинг кўриниши ҳорғин ва гапиришда қийналаётганини қайд этган. Спиртли ичимликлар ичганми, деган саволга у салбий жавоб берди. Жаклин ўзининг "Коринтианс" футбол клубининг профессионал спортчиси эканлигини ва бир кун олдин жамоадошлари билан "Палмейрас" устидан қозонилган ғалабани нишонлагани, лекин спиртли ичимлик истеъмол қилмаганини айтди.
Футболчи полиция бўлимида кўрсатма берди, шундан сўнг у қўйиб юборилди.
