2013 йилнинг 21 май – 4 июнь кунлари Грециянинг Салоники шаҳрида FIDE Гран-Присининг навбатдаги босқич мусобақаси ўтказилади ва унда жами 12 нафар халқаро гроссмейстерлар ғолиблик учун дона сурадилар.

Дунёнинг етакчи шахмат усталари иштирокида ўтаётган мазкур нуфузли мусобақаларда Ватанимиз шарафини жаҳоннинг 17-чемпиони Рустам Қосимжонов ҳимоя қилади. Ҳамюртимиз Лондон (Буюк Британия), Тошкент (Ўзбекистон) ва Цуг (Швейцария) шаҳарларида ўтказилган дастлабки уч босқичда ҳам муносиб иштирок этиб, пойтахтимизда бўлиб ўтган иккинчи босқич мусобақасида бирорта ҳам партияда мағлубиятга учрамади.

Салоники шаҳрида ўтказиладиган тўртинчи босқичда Рустам Қосимжоновдан (2699) ташқари яна икки нафар собиқ жаҳон чемпионлари Руслан Пономарев (Украина, 2742) ва Веселин Топалов (Болгария, 2793), шунингдек, Александр Морозевич (Россия, 2760), Фабиано Каруано (Италия, 2774), Хикару Накамура (АҚШ, 2775), Александр Гришук (Россия, 2779), Гата Камски (АҚШ, 2741), Василий Иванчук (Украина, 2755), Перес Домингес (Куба, 2723), Петр Свидлер (Россия, 2769) ҳамда Этъен Бакро (Франция, 2725) баҳс юритадилар.

Мукофот жамғармаси 170.000 еврони ташкил қилган тўртинчи босқич мусобақасининг тантанали очилиш маросими бугун маҳаллий вақт билан соат 18:30да Салоники шаҳридаги “Palace Hotel” меҳмонхонасида ўтказилади. Биринчи тур баҳслари 22 май маҳаллий вақт билан 14:00да бошланади.

Эслатиб ўтамиз, FIDE Гран-При мусобақалари 6 босқичдан иборат бўлиб, унда жами 18 нафар гроссмейстер тўрт босқичда иштирок этиш хуқуқига эга. Саралаш ўйинлари якунлангач, умумий натижаларга кўра биринчи ва иккинчи ўринни эгаллаган гроссмейтерлар, 2014 йили ўтказиладиган даъвогарлар турнирида иштирок этадилар. Даъвогарлар турнирида ғолиб чиққан гроссмейстер жаҳон тожи учун амалдаги чемпион Више Ананд (Ҳиндистон) билан баҳс юритади.