Мадриднинг "Реал" клуби ярим ҳимоячиси Лука Модрич тарихий муваффақиятга эришди.
Хорватиялик футболчи "Валенсия"га қарши ўйиннинг 80-дақиқасида захирадан майдонга тушган бўлса, атиги беш дақиқа ўтиб ҳисобни тенглаштирди – 1:1.
MisterChip хабарига кўра, ярим ҳимоячи "Реал Мадрид" тарихидаги расмий ўйинларда гол урган энг кекса футболчига айланди - 39 ёшу 116 кун. Аввалги рекордчи 1966 йилда 39 ёшу 15 кунлигида гол урган афсонавий Ференц Пушкаш эди.
Бугунги гол Лука Модричнинг жорий мавсумдаги биринчи голи бўлди. Умуман олганда, фахрий барча мусобақаларда Мадрид гранди сафида 561 учрашувда 40 та гол урган.
