Якшанба куни бўладиган финал иштирокчиларида бир бирига зид бўлган хусусият бор.

Одатда «Барселона» биринчи таймларни яхши ўйнайди. Ижрочилар ёш, дастлабки режа доим яхши уддаланади, ўйин охирларига бориб эса пасайиш кузатилади. Ўйин тизгинини бой бериб қўйиши мумкин. Жамоа ёш ва янги.

«Реал» бутунлай акси. Иккинчи таймларни, ўйин охирларини яхши ўтказади. Чунки ижрочиларга урғу кўпроқ. Улар ўйинга киришиб олиши, рақибни ҳис қилиши керак, шундан кейингина ожиз нуқталарни топишни бошлашади.

Ярим финаллар ҳам буни исботлади. Шунақа сценарийни кўрдик. Агар «Атлетик» бироз диққатлироқ ўйнаганда, ўйин охирида бурилиш ясаши ҳам мумкин эди.

Шу жиҳатдан, финал қизиқ бўлади. Ўйин бошланиши «Барселона» учун муҳимроқ. Ўша паллада устунликни материаллаштириш, голлар уриш керак. Ўйин якунига борган сари, «Реал»нинг устунлиги ортиб боради. Менимча, сал пал «Реал» фаворит. Аммо ўтган сафар ҳам шундай деб ўйлагандим.

Қаҳрамон Асланов