"Ланс" марказий ҳимоячиси Абдуқодир Ҳусанов "Манчестер Сити"га ўтади. Клублар трансфер шартлари бўйича тўлиқ келишувга эришди, деб хабар беради журналист Жулиен Лауренс.
Якуний расмиятчиликларни томонлар дам олиш кунлари якунлаши кутилмоқда, шундан сўнг 20 ёшли ўзбекистонлик футболчи “шаҳарлик” сафига қўшилишга тайёр бўлади. Ишончли маълумотларга кўра, келишувнинг умумий қиймати бонусларни ҳисобга олган ҳолда 50 миллион евро атрофида бўлади.
Абдуқодир жорий мавсумда “Ланс” сафида 16 та ўйинда майдонга тушиб, битта голли узатмани амалга оширган. Аввал хабар қилинганидек, футболчи Англиянинг топ-клубига ўтишга розилик берган.
