"Lans" markaziy himoyachisi Abduqodir Husanov "Manchester Siti"ga o‘tadi. Klublar transfer shartlari bo‘yicha to‘liq kelishuvga erishdi, deb xabar beradi jurnalist Juliyen Laurens.
Yakuniy rasmiyatchiliklarni tomonlar dam olish kunlari yakunlashi kutilmoqda, shundan so‘ng 20 yoshli o‘zbekistonlik futbolchi “shaharlik” safiga qo‘shilishga tayyor bo‘ladi. Ishonchli ma’lumotlarga ko‘ra, kelishuvning umumiy qiymati bonuslarni hisobga olgan holda 50 million yevro atrofida bo‘ladi.
Abduqodir joriy mavsumda “Lans” safida 16 ta o‘yinda maydonga tushib, bitta golli uzatmani amalga oshirgan. Avval xabar qilinganidek, futbolchi Angliyaning top-klubiga o‘tishga rozilik bergan.
