"Наполи"нинг грузиялик вингери Хвича Кварацхелия шу ҳафтанинг ўрталарида Франциянинг "ПСЖ" клубига ўтиши мумкин. Бу ҳақда L'Équipe нашри хабар берди.

Манбага кўра, бугун Италия ва Франция клублари ўртасидаги музокараларда ҳал қилувчи кун бўлиши керак. Қайд этилишича, томонлар ўртасида тўлиқ келишувга эришилса, грузиялик тиббий кўрикдан ўтиш учун чоршанба ёки пайшанба (15-16 январь) куни Парижга келади.

Аввалроқ ОАВда Кварацхелия яна бир қанча фойдали таклифларни рад этиб, "ПСЖ"га ўтишга рози бўлгани ҳақида хабарлар тарқалганди. Унинг француз клубидаги маоши Италиядаги амалдаги шартномасига нисбатан 5 баробар ошиши мумкин. Футболчининг "Наполи" билан амалдаги шартномаси 2027 йилнинг ёзига қадар тузилган.

Жорий мавсумда 23 ёшли грузиялик футболчи клуб сафида барча турнирларда 18 та ўйин ўтказиб, 5 та гол урди ва 3 та голли узатмани амалга оширди.