"Зенит" бразилиялик футболчи учун 30 миллион евродан кўпроқ таклиф қилган.
Санкт-Петербург клуби "Ботафого"нинг ўнг қанот вингери Луис Энрике Андренинг трансфери бўйича музокаралар олиб бормоқда.
Аввалроқ "Зенит" Луис Энрике учун 25 миллион еврогача тўлаши, Вендел ва Артур ҳам трансферга қўшилиши мумкинлиги ҳақида хабар берилганди.
Бироқ журналист Пауло Винисиус Коэльонинг UOL Esporte нашрида таъкидлашича, "Ботафого", "Лион" ва "Кристал Пэлас" хўжайини Жон Текстор унга РПЛ клубининг 35 миллион таклифи ҳақида маълум қилган. Музокаралар якунига етаётгани айтилмоқда.
"Текстор Луис Энрикенинг нархи 35 миллион евро эканлигини айтди. "Зенит 35 миллион таклиф қилди. Келишув ҳали якунлангани йўқ, лекин ёпилишга яқин", - деди Коэльо.
Журналист Андре Эрнан трансфер нархи 45 миллионга етиши мумкинлигини бошқа манбадан эшитганини қўшимча қилди.
Футболчи учун курашда "Зенит"дан ташқари Италиянинг "Фиорентина" клуби ва Англиянинг бир клуби ҳам иштирок этмоқда.
Энрике "Ботафого" сафида 55 та ўйинда майдонга тушиб, 12 та гол урди ва 6 та голли узатмани амалга оширди. Бразилия терма жамоаси сафида 6 учрашувда 2 та гол урди ва 1 та голли узатмани амалга оширди.
