CAFA мусобақаси тўртинчи кун баҳслари доирасида терма жамоамиз мезбон Тожикистонга қарши кураш олиб борди.

Ўзбекистоннинг йирик ғалаба қозонишига нафақат голлари, балки фаоллиги билан ҳам катта ҳисса қўшган Дилдора Нозимова учрашувнинг "Энг яхши ўйинчиси" деб топилди.

Беллашувдан кейин биз Дилдора Нозимованинг тассуротлари билан қизиқдик.

"Авваламбор, ассалому алайкум. Биз CAFA мусобақасига чемпионликни кўзлаб, тайёргарлик кўргандик. Бироқ Эронга қарши ўйинда мағлубиятга учрадик. Биринчи бўлимда тенг кураш кечди ва ҳисоб 1:0 эди, аммо иккинчи бўлим бошида кетма-кет ўтказиб юборилган голлардан сўнг, ўйинга қайтиш қийин бўлди. Шундай бўлсада, қолган барча учрашувларда зафар қучиб, 2-ўринни олмоқчимиз. Худо хоҳласа, Ўзбекистонимизга 2-ўрин билан қайтамиз.

Тожикистонга қарши баҳсга келсак, рақиб бизга қарши ўйинга яхши тайёргарлик кўргани сезилди. Улар ўйинимизни ўрганиб чиққан. Рақиб яхши қаршилик кўрсатди, лекин биз имкониятларимизни ишга солиб, ғалаба қозондик. Кейинги учрашув ҳам биз учун муҳим ва унга ҳам яхши тайёрланиб, албатта, ғалаба учун майдонга тушамиз.

Бизни қўллаб-қувватлашаётгани, ишонч билдиришгани учун бутун халқимизга каттакон раҳмат айтмоқчиман".

Эслатиб ўтамиз, Ўзбекистон терма жамоаси охирги турда, эртага, Қирғиз Республикасига қарши баҳс олиб боради.