CAFA musobaqasi to‘rtinchi kun bahslari doirasida terma jamoamiz mezbon Tojikistonga qarshi kurash olib bordi.
O‘zbekistonning yirik g‘alaba qozonishiga nafaqat gollari, balki faolligi bilan ham katta hissa qo‘shgan Dildora Nozimova uchrashuvning "Eng yaxshi o‘yinchisi" deb topildi.
Bellashuvdan keyin biz Dildora Nozimovaning tassurotlari bilan qiziqdik.
"Avvalambor, assalomu alaykum. Biz CAFA musobaqasiga chempionlikni ko‘zlab, tayyorgarlik ko‘rgandik. Biroq Eronga qarshi o‘yinda mag‘lubiyatga uchradik. Birinchi bo‘limda teng kurash kechdi va hisob 1:0 edi, ammo ikkinchi bo‘lim boshida ketma-ket o‘tkazib yuborilgan gollardan so‘ng, o‘yinga qaytish qiyin bo‘ldi. Shunday bo‘lsada, qolgan barcha uchrashuvlarda zafar quchib, 2-o‘rinni olmoqchimiz. Xudo xohlasa, O‘zbekistonimizga 2-o‘rin bilan qaytamiz.
Tojikistonga qarshi bahsga kelsak, raqib bizga qarshi o‘yinga yaxshi tayyorgarlik ko‘rgani sezildi. Ular o‘yinimizni o‘rganib chiqqan. Raqib yaxshi qarshilik ko‘rsatdi, lekin biz imkoniyatlarimizni ishga solib, g‘alaba qozondik. Keyingi uchrashuv ham biz uchun muhim va unga ham yaxshi tayyorlanib, albatta, g‘alaba uchun maydonga tushamiz.
Bizni qo‘llab-quvvatlashayotgani, ishonch bildirishgani uchun butun xalqimizga kattakon rahmat aytmoqchiman".
Eslatib o‘tamiz, O‘zbekiston terma jamoasi oxirgi turda, ertaga, Qirg‘iz Respublikasiga qarshi bahs olib boradi.
