Марко Асенсионинг дубли "Астон Вилла"га Премьер-лига доирасидаги "Челси"га қарши ўйинда (2:1) ғалаба келтирди.

Учрашув бошида лондонликлар Энцо Фернандеснинг саъй-ҳаракатлари билан ҳисобни очган бўлса, "вилла" иккинчи бўлимда вазиятни ўзгартиришга ўзида куч топа олди. Янги футболчилар қаҳрамон бўлишди: "ПСЖ"дан ижарага олинган Асенсио "Манчестер Юнайтед"дан ижарага олинган Маркус Рэшфорднинг узатмаларидан кейин икки марта гол урди. Эътиборлиси, испаниялик футболчи узоқ вақтдан бери - 2021 йил сентябридан бери илк марта ўйинда биттадан ортиқ гол урди. Ўшанда футболчи Мадриднинг "Реал" жамоасида ўйнаб юрганида Ла Лиганинг "Мальорка"га қарши ўйинида хет-трик қайд этганди.

Марко Асенсио 2023 йилнинг ёзида "қироллик клуби"дан "ПСЖ"га эркин агент сифатида ўтганди. "Астон Вилла" сафига вингер жорий ой бошида келиб қўшилди.