Англиянинг “Манчестер Сити” клубида “февраль ойининг энг яхши футболчиси” аниқланмоқда. Кучли учликдан Эрлинг Ҳоланд, Йошко Гвардиол ва Абдуқодир Ҳусанов жой олди.

Қуйида, ушбу футболчиларнинг февраль ойидаги статистикасини тақдим этамиз.

Эрлинг Ҳоланд

Эрлинг Ҳоланд февраль ойида анча самарали ҳаракат қилди. Норвегиялик форвард тўртта ўйинда майдонга тушиб, 4 та гол киритди ва бир ассист қайд этди. Футболчи ой бошида “Арсенал” дарвозасига боши билан чиройли гол урди. Кейин Чемпионлар Лигаси доирасидаги “Реал Мадрид”га қарши баҳсда дубль расмийлаштирган бўлса, “Ньюкасл”га қарши ўйинда битта ассист қайд этди. Бироқ шу учрашувда тиззасидан жароҳат олиб, “Реал” билан жавоб баҳси ва “Ливерпуль”га қарши учрашувларни ўтказиб юборди. Жароҳатдан қайтгач, норвегиялик юлдуз навбатдаги голини киритди — “Тоттенҳэм”га қарши баҳсда унинг ягона голи ўйин тақдирини ҳал қилди.

Абдуқодир Ҳусанов

20 ёшли ўзбекистонлик ҳимоячи Абдуқодир Ҳусанов “Сити” сафидаги дебют ўйинида бир оз ҳаяжон билан ўйнаган бўлса-да, кейинги баҳсларда ишончли ҳаракатлари билан эътирофга сазовор бўлди. Абдуқодир “шаҳарликлар” сафидаги иккинчи учрашувида “Лейтон Orient” дарвозасига гол уриб, жамоасига ҳисобни тенглаштиришга ёрдам берди. Кейин “Ньюкасл” қарши майдонга тушган ёш ҳимоячи Александер Исак ва Антони Гордон каби кучли ҳужумчиларни бутун ўйин давомида зарарсизлантирди ва “Сити” 4:0 ҳисобида йирик ғалабага эришди.

Ҳусанов Мадридда “Реал”нинг икки юлдузи – Винисиус Жуниор ва Килиан Мбаппега қарши ҳаракат қилди. Жамоаси 1:3 ҳисобида мағлуб бўлишига қарамай, Абдуқодир яхши ўйин намойиш этди. Ўзбекистонлик футболчи “Ливерпуль”га қарши майдонга тушди ва 90 дақиқа ҳаракат қилди. У февраль ойини ажойиб ўйин билан якунлади – “Сити” сафарда “Тоттенҳэм” устидан 1:0 ҳисобида ғалаба қозонди. Тўлиқ ўйин ўтказган Ҳусанов эса мухлисларнинг янги қаҳрамонига айланди.

Йошко Гвардиол

“Манчестер Сити” ҳимоячиси Йошко Гвардиол февраль ойида ажойиб ўйинлар намойиш этди. Истеъдодли хорватиялик футболчи “Ньюкасл” ва “Тоттенҳэм”га қарши учрашувларда ишончли ҳаракат қилиб жамоасининг “қуруқ” ўйин ўтказишига ёрдам берди. Шунингдек, у ҳужумга қўшилиш борасида ҳам самарали ўйнаб келмоқда. Гвардиол “Реал Мадрид”га қарши “Etihad”даги баҳсда Эрлинг Ҳоланднинг биринчи голига ҳаммуаллифлик қилди ҳамда жамоадошларига бир қанча қулай имкониятлар яратди.

У ишончли ҳаракатлари ва ҳужумга қўшилиш қобилияти орқали “Сити”нинг муҳим футболчига айланиб бормоқда.