"Лион" бош мураббийи Пауло Фонсека 24-турнинг "Брест"га қарши ўйинида (2:1) қизил карточка олиб, 7 ойга дисквалификация қилиниши мумкин.
Бу ҳақда RMC Sport хабар бермоқда.
Эслатиб ўтамиз, португалиялик мутахассис иккинчи бўлимда учрашув бош ҳаками Бенуа Милло билан тўқнашиб кетган ва ўз шикоятларини тажовузкорона билдира бошлаганди.
Ҳакам ва мураббийни “Лион” ярим ҳимоячиси Корентин Толиссо ажратди.
Пауло Фонсека ўйиндан кейинги матбуот анжуманида юз берган воқеа учун узр сўради. Манбага кўра, Лига 1 тартиб-интизом қўмитаси португалияликка нисбатан жиддий жазо чораларини қўллашни режалаштирган.
Хабар қилинишича, Фонсеканинг хатти-ҳаракати тартиб-интизом қўмитасининг "қўрқитиш ёки таҳдид солувчи хатти-ҳаракатлар" бўйича 8-моддасига тўғри келади.
Лиганинг қоидаларида шундай дейилган: "Қўрқувни уйғотиши мумкин бўлган барча сўзлар, имо-ишоралар ёки муносабатлар мумкин эмас".
