"Lion" bosh murabbiyi Paulo Fonseka 24-turning "Brest"ga qarshi o‘yinida (2:1) qizil kartochka olib, 7 oyga diskvalifikasiya qilinishi mumkin.
Bu haqda RMC Sport xabar bermoqda.
Eslatib o‘tamiz, portugaliyalik mutaxassis ikkinchi bo‘limda uchrashuv bosh hakami Benua Millo bilan to‘qnashib ketgan va o‘z shikoyatlarini tajovuzkorona bildira boshlagandi.
Hakam va murabbiyni “Lion” yarim himoyachisi Korentin Tolisso ajratdi.
Paulo Fonseka o‘yindan keyingi matbuot anjumanida yuz bergan voqea uchun uzr so‘radi. Manbaga ko‘ra, Liga 1 tartib-intizom qo‘mitasi portugaliyalikka nisbatan jiddiy jazo choralarini qo‘llashni rejalashtirgan.
Xabar qilinishicha, Fonsekaning xatti-harakati tartib-intizom qo‘mitasining "qo‘rqitish yoki tahdid soluvchi xatti-harakatlar" bo‘yicha 8-moddasiga to‘g‘ri keladi.
Liganing qoidalarida shunday deyilgan: "Qo‘rquvni uyg‘otishi mumkin bo‘lgan barcha so‘zlar, imo-ishoralar yoki munosabatlar mumkin emas".













