Осиё футболи бўйича мутахассисга айланиб қолган таниқли журналист Жон Дуерден "Ал-Жазийра" сайти учун Ўзбекистон миллий терма жамоаси ҳақида мақола ёзди. Ушбу мақолани ўзбек тилига таржима қилган ҳолда, мухлисларга ҳавола этамиз.

Марказий Осиё қитъа футболининг ҳеч қачон марказида бўлмаган. Лекин Ўзбекистон Сеулда Жанубий Кореяни мағлубиятга учратса, улар биринчи марта ЖЧ йўлланмасини қўлга киритишида ва вазиятни бутунлай ўзгартиришади. Бу ҳодиса рўй берса, минтақада катта байрам бошланади. Ўзбекистон ўзининг қўшнилари — Туркманистон, Тожикистон ва Қирғизистон (Қозоғистон ҳозир УЕФАга ўтиб кетган) билан биргаликда 90-йилларнинг бошида мустақилликни қўлга киритган. Бунгача эса улар Иттифоқ футболининг бир бўлаги бўлишган холос. Улар 1994 йилда Осиё ўйинларида кучли рақибларни мағлубиятга учратиб, ғолибликни қўлга киритишган. Кейинчалик ҳам Ўзбекистон қитъанинг энг кучли жамоалари сафига қўшилишга интилган, аммо бунга эриша олмаган.

"Осиё футбол конфедерацияси ва Осиё футболида ўз ўрнимизни топиб олиш учун бизга бир қанча вақт керак бўлди. Биз эса бу вақт давомида ишлашда давом этдик ва ҳозирги кунга келиб кучли терма жамоага эга бўлдик", дейди Ўзбекистон футбол федерацияси президенти Мираброр Усмонов "Ал-Жазийра"га берган интервьюсида.

Осиёнинг икки карра энг яхши футболчиси Сервер Жепаров ажойиб техникаси ва майдонни яхши кўра олишии билан ажралиб туради. У 30 ёшга кирганига қарамай, Европада ўйнашни истайди. "Анжи"да ўйнаётган 25 ёшли Одил Аҳмедовга эса Лондоннинг "Арсенал" клуби томонидан қизиқишлар бўлди. Игнатий Нестеров эса Осиёнинг энг кучли дарвозабонларидан бири ҳисобланади. Терма жамоанинг баъзи аъзолари учун ушбу саралаш босқичи ЖЧга бориш учун сўнгги имконият ҳисобланади. Ўзбекистон Кореяда ҳеч қачон Кореяни ютмаган бўлса-да, сешанба кунги ўйин олдидан буни ҳеч кимга эътиборга олаётгани йўқ. Барча фақат ғалаба ҳақида ўйламоқда.

8 йил аввал "оқ бўрилар" ўз гуруҳларида 3-ўринни эгаллаб, плей-офф йўлланмасини қўлга киритишганди. Улар фақат Баҳрайн ва Тринидад ва Тобагодан ўтишлари керак эди. Улар Тошкендаги ўйинни яхши бошлашди. Улар Баҳрайн дарвозасини ишғол қилишди ва кейин пенальти тепиш ҳуқуқини қўлга киритишди. Жепаров пенальтини голга айлантирди, аммо ҳакам Тошимицу Йошида ҳуштак чалиб, голни бекор қилди. Кутилмаганда, япониялик ҳакам пенальтидан қайтадан амалга оширишга кўрсатма бериш ўрнига рақиб фойдасига эркин зарба берди. Ўйин 1:0 ҳисоби билан якунланди. "Агар пенальти қайтадан берилганида, биз жуда катта устунликка эга бўлардик ва Баҳрайнни камида 3:0 ёки 4:0 ҳисобида енгган бўлардик", дейди терма жамоанинг ўша пайтдаги бош мураббийи Боб Хоутон. "Танаффусда захира ҳакамида ушбу вазият ҳақида сўрадим, у эса, жин ургур, бу янги қоида эканини таъкидлади".

ЎФФ раҳбариятидан ФИФАдан ҳакамнинг хатоси учун терма жамоа 3:0 ҳисобида техник ғалаба сўради. ФИФА эса ўйинни қайтадан ўтказиш ҳақида қарор чиқарди. Тошкентдаги такрорий ўйин 1:1 ҳисоби билан якунланган бўлса, Манамадаги ўйинда ҳисоб очилмаганди.

Ўзбекистон 2007 ва 2011 йилги Осиё кубогида яхши иштирок этди, ЖЧ-2010 йўлланмаси учун кураш олиб борди. Бразилия йўлланмаси учун кураш бироз бошқача йўналиш олди. Сўнгги босқич ёмон бошланди. Тақвимга кўра, терма жамоа дастлабки турда қитъанинг кучли жамоаларидан бири Эронни ўз майдонида қабул қилди. ФИФАнинг қарорига Ўзбекистоннинг 5 нафар футболчиси ушбу ўйинда майдонга туша олмади. Шунга қарамай, жамоа ўйинда катта ташаббусга эришди. Аммо ўйиннинг 94-дақиқасида қарши ҳужумда тўп ўтказиб юбориб, аламли мағлубиятга учради. Шундан сўнг Вадим Абрамов терма жамоадан четлатилди, Қосимов эса иккинчи марта терма жамоага қайтарилди.

Гўёки унинг терма жамоага қайтарилиши катта аҳамиятга эга эмасдек, Ливанга қарши ўйин дуранг билан якунланди. Жанубий Корея билан уйдаги ўйин Ўзбекистонни ЖЧ-2014 умидидан бутунлай маҳрум қилиши мумкин эди, аммо Санжар Турсуновнинг иккита голи майдон эгаларига дурангни тақдим этди. Ушбу футболчининг ўзи Қатар билан сафардаги ўйинда ягона голни киритди. Теҳронда кечган ўта муҳим ўйинда қайд этилган 1:0 ҳисобидаги ғалаба ва Тошкентда Ливан устидан қозонилган кичик ҳисобдаги ғалабадан сўнг вазият бутунлай ўзгариб кетди.

Июнь ойидаги 2та ўйинда эса кўп нарсани ўзгартириш имконини беради. Ўзбекистон Кореяда ғалаба қозонса, ЖЧга чиқади. Аммо бу сўнгги имконият бўлиб қолмайди. Сеулда дуранг қайд этиб, Тошкентда Қатар мағлуб этилса ҳам Ўзбекистон ўз мақсадига етади.

Мираброр Усмонов, ўзининг миллионлаб ватандошлари каби, бунга жуда катта умид қилмоқда.

"Биз аввал ҳам ЖЧга яқин келганмиз. Бутун мамлакат бу сафар сўнгги қадамни ташлашимизга ишонмоқда. Олдимизда яна 2та ўйин қолди. Биз бу ўйинларни интизорлик билан кутяпмиз. Ўзбекистонни жаҳон чемпионатида кўриш ва дунёнинг энг кучли терма жамоаларига қарши ўйнаш жуда катта фахр туйғусини беради".