Ливанга қарши ўйиндан дуранг натижа қайд этганига қарамай, Жанубий Корея терма жамоаси аъзолари Ўзбекистон билан ўйинда ғалабага ишонишаётганига ҳақида таъкидлашди.

Ливан билан дуранг (1:1) натижадан кейин Жанубий Корея гуруҳда 1-ўринга кўтарилиб олди. Корея ва Ўзбекистон ўртасидаги баҳс 11 июнь куни Сеул шаҳрида маҳаллий вақт билан соат 20:00да бошланади. Кореяликларнинг сўнгги баҳси эса 18 июнь куни Ульсан шаҳрида Эронга қарши бўлиб ўтади.

Жанубий Корея бош мураббийи Чой Канг Хи Ўзбекистонни мағлуб этиб, вазиятни яхшилаб олиш ҳақида гапириб ўтди.

"Ўзбекистон ютса бўладиган жамоа ҳисобланади", дейди Чой терма жамоаларнинг Пажудаги машғулот базасида журналистларга интервью бераркан. "Ўзбекистонни кучли рақиб деб ўйламайман. Улар бизга нисбатан қандай стратегия қўллашига кўп нарса боғлиқ. Боиси, улар бизга нисбатан ўйнаш тажрибасига эгалар".

Ўзбекистон терма жамоаси сардори Сервер Жепаров ҳозирги пайтда "Сеонгнам Ильва Чунма"да тўп сураётган бўлса, ундан аввал "Сеул" ФКда ҳам ўйнаган. Шунингдек, Александр Гейнрих "Сувон", Темур Кападзе "Инчхон Юнайтед" жамоаларида фаолият олиб боришган.

Чой энг аввало ҳимоя чизиғини мустаҳкамлаш ҳақида ўйламоқда. Ким Йонг Квон ва Парк Чжу Хо Ўзбекистонга қарши ўйинда ҳимоя марказида ўйнаш учун асосий даъвогар бўлиб турибди. Ҳар иккала футболчи бугун ҳимояни мустаҳкамлашга ҳаракат қилишини айтиб ўтишди.

"Ўзбекистон терма жамоаси сафида Сервер Жепаров жуда хавфли футболчи ҳисобланади", дейди ҳимоячи Парк. "Ҳимоячилар ундан эҳтиёт бўлиши керак".