Ҳал қилувчи ўйин яқинлашаркан таҳлил ва фикрлар сони кўпайиб боради. Жумладан, Жанубий Кореянинг бир қатор нашрларида Ўзбекистон терма жамоасининг ўйинлари Сервер Жепаров орқали ташкил этилиши айтилмоқда. Шу билан бирга терма жамоамизнинг бошқа футболчиларига ҳам баҳо бераркан, корейс нашрлари Азизбек Ҳайдаров ва Одил Аҳмедовларни ҳам тилга олади.

"Ҳозирда Гус Хиддинкдан таълим олаётган Одил Аҳмедов таянч ярим ҳимоячиси, марказий ярим ҳимоя, қанот ярим ҳимоячиси ва кези келганда марказий ҳимояда ҳам бемалол ўйнай оладиган универсал футболчи. Унинг қайси чизиқда тушишига қараб, терма жамоанинг тактикаси ўзгариб туради. Шу даражада муҳим ўйинчи. БААда муваффақиятли тўп суриб келаётган Азизбек Ҳайдаровни ҳам эътибордан четда қолдириб бўлмайди. Кўпинча 4-4-1-1 тизимида ўйнайдиган Ўзбекистон терма жамоасида у ҳимояга яқин жойда ҳаракатланади. Шунингдек, Россияда тўп сурадиган Виталий Денисов ва қария Улуғбек Бақоев ҳам ўз тажрибалари билан терма жамоада керакли ролни бажаради", деб ёзади "Интер футбол" интернет нашри.

Нашр, шунингдек, “Поханг Стилерс” клуби бош мураббийи Хванг Сон Хонгнинг терма жамоамиз бош мураббийи Миржалол Қосимов ҳақидаги фикрини келтиради: "Уни “Корея киллери” деб аташмоқда. Менимча, ҳам у корейс жамоаларига қарши қандай ўйнаш кераклигини билиб олган. Эҳтиёткорлик шарт".

Отабек Йўлдошев
Жанубий Корея, Сеул