Яқинлашаётган Ўзбекистон билан ўйин ҳақида Жанубий Кореянинг бир қатор нашрлари каби "Sportal Korea" нашри ҳам қатор тахмин ва таҳлилларини илгари сурди. Жумладан, нашр бош мураббийни танқид остига оларкан, шундай ёзади:
"Ливан билан сафар ўйинида бош мураббий Чой Канг Хи майдонга тушолмайдиган Ки Сун Йонг ва Ку Жа Чолнинг ўрнини билдирмаслик учун "Кардиф Сити" аъзоси бўлган Ким Бо Кёнгни марказий чизиқда ўйнатди. Таъбир жоиз бўлса, "ярашмаган либосни кийиб олиш таажжуб ва кулгу уйғотганидек" Ким Бо Кёнг ҳам ушбу чизиққа мослашолмай ҳайратимизга сабаб бўлди. Ҳужумчи Ли Донг Гукнинг ортида ҳаракатланган Ким Бо Кёнг на ҳужумкорлик ва на самарали тўп оширишда кўзга ташланди. Бизнингча, Ким Бо Кёнг чап қанотда фойдалироқ ва марказни эгаллашга номзодлар эса етарлича. Тахминан бу чизиқда Жи Донг Вон, Ли Кеун Хо ва Сонг Хеинг Мин ҳаракатланиши фойдалилик коэффициентини оширади. Чунки бу учала футболчи ҳам ўз клубларида мана шу чизиқда ўйнаш ҳадисини олишган. Ушбу вазиятда ҳужумда Ким Шин Вук ва Ли Донг Гук ҳаракатланишса айни муддао. Нима бўлганда ҳам охирги сўзни бош мураббий Чой Канг Хи айтади".
Отабек Йўлдошев, Жанубий Корея, Сеул
