Бугун ЖЧ-2026 саралаши доирасида миллий терма жамоамиз Теҳронда Эронга қарши ниҳоятда жуда муҳим ўйинини ўтказади.
Бугун шундай кунки, агар барчаси биз ўйлагандек амалга ошса ва Ўзбекистон Эрондан ғалаба билан қайтадиган бўлса, тарихда илк маротаба мундиал йўлланмасини қўлга киритиши мумкин. Бундай муҳим паллада футболчиларимизни ҳар томонлама қўллаб-қувватлаш, уларга руҳий далда бериш ҳар қачонгидан муҳим ҳисобланади.
Шу мақсадда дунёга донғи кетган, ўтган йили Париж Олимпиадасида спортчиларимизни ўзининг ажойиб қўллаб-қувватлаши билан ёрқин из қолдирган "Андижон" фан-клуби энди Теҳрондаги машҳур "Озодий" стадионида ҳам терма жамоамизга катта "поддержка" беради.
Бугун эрталаб "Андижон"нинг 200 дан зиёд мухлислари Андижон аэропортидан чартер рейс орқали Эрон пойтахти Теҳронга жўнаб кетдилар.
Сафар олдидан шахсан Андижон вилояти ҳокими Шуҳратбек Абдураҳмонов фан-клуб аъзоларига оқ йўл, терма жамоамизга муваффақият ёр бўлишини тилаган ҳолда кузатиб қўйди.
"Андижон" ишқибозларининг "Озодий" стадионида ўзгача қўллаб-қувватлаши шубҳасиз терма жамоамизга қўшимча куч бағишлайди.
Эслатиб ўтамиз, Эрон-Ўзбекистон баҳси бугун 21:00 да бошланади.
