Миланнинг "Интер" клубининг бирйўла уч вакили А Сериянинг жорий мавсумида энг юқори ўртача балл тўплаган беш футболчи қаторига кирди.

WhoScored статистик портали талқинига кўра, айни дамда Италия чемпионатининг энг яхши футболчиси "Аталанта" вакили Адемола Лукман бўлиб турибди - унинг ўйинлари 7,37 балл билан баҳоланмоқда. Иккинчи ўринни "Интер" форварди Маркус Тюрам эгаллаб турибди - 7,29 балл, учинчи поғонани ўша "Интер"дан Лаутаро Мартинес ва тўпурарлар рўйхатида етакчилик қилаётган Матео Ретеги ("Аталанта") 7,22 балл билан бўлишиб турибди. Кучли бешликни "нерадзуррилар" хавбеки Хоқон Чалханўғли якунлаб берди - 7,19.

"Интер" А Серия 29-туридан кейин 64 очко билан "Наполи" (61) ва "Аталанта"ни (58) ортда қолдириб, турнир жадвалида пешқадамлик қилмоқда.