"Манчестер Сити" устози Хосеп Гвардиола жорий мавсумда Фил Фоденнинг ўйини пасайиши ҳақида гапирди.
Англиялик футболчи барча мусобақаларнинг сўнгги 14 ўйинида атиги битта голли узатмани амалга оширди. Якшанба куни 24 ёшли ҳужумкор ярим ҳимоячи "шаҳарликлар"га Англия кубоги 1/4 финалида "Борнмут"ни мағлуб этишда ёрдам берди ва майдонда 69 дақиқа ҳаракат қилди.
"Футболчининг узоқ йиллик фаолиятида, албатта, пасайиш ҳолатлари бўлади. Агар жамоамизнинг ишлари яхши бўлганида, Фил ҳам яхшироқ ўйнай оларди. Биз ҳеч қачон ёлғиз унга суянмаймиз. Муаммоларни бутун жамоа билан ҳал қилиш керак.
Баъзида одамлар мени футболчиларни ривожлантираётганимни айтишади. Йўқ - улар умумий ғоя учун биргаликда ўйнаб, ўзлари ривожланадилар. Фоден ҳали ёш. У албатта ўз даражасига қайтади," - дея Гвардиоланинг сўзларини келтиради City Report.
