Кеча, 9 июнь куни бир неча журналист ва мухлислардан иборат делегация билан Сеулга йўл олган Мурод Ризаев, Жанубий Корея - Ўзбекистон ўйинини стадиондан туриб шарҳлаб боради. Биз Мурод акадан сафар таассуротлари ва эртанги ўйин борасидаги фикрлари сўрадик.

"Биз бугун ўзбекистонлик журналистлар билан биргаликда ўйинолди матбуот анжуманида иштирок этдик. Матбуот анжумани 2 соатга яқин давом этди. Унда жуда кўп (100га яқин) журналистлар иштирок этишди. "World Cup" стадионидаги ҳар иккала жамоа машғулотининг дастлабки 15 дақиқаси журналистлар учун очиқ бўлди. Терма жамоамиз машғулот давомида бурчак тўпларини қайтариш, рақиб ҳужумларини бартараф этиш, тезкор қарши ҳужумга ўтиш каби ҳолатларга эътибор қаратди.

Эртага даҳшатли ўйин кутиб турибди. Майдон марказида устунликни қўлга олсак, фақат қанотлар билан чекланиб қолмасак, рақиб жарима майдончаси ичида ва атрофида совуққон ҳаракат қилсак, Жанубий Кореяни ютса бўлади. Сервер Жепаров ва Одил Аҳмедовнинг ўйинига кўп нарса боғлиқ.

Пойтахт Сеул ҳақида тўхталадиган бўлсам, об-ҳаво яхши. Беш юлдузли "My Field" меҳмонхонасига жойлашганмиз. Корея миллий валютаси воннинг АҚШ долларига нисбатан курси: 1 доллар — 1066 вон. Ўзбек ва корейс овқатлари ўртасида фарқ катта лабтта. Ўзимизнинг ошга етмайди. Шунингдек, мевалари ҳам бизнинг мевалар каби унчалик ширин эмас.

Лекин булар унчалик аҳамиятга эга эмас. Шунчаки маълумот учун айтдим. Энг асосийси, терма жамоамиз ғалаба қозониб, Тошкентга Бразилия йўлланмаси  билан қайтсак бўлгани".