Осиё футбол конфедерацияси (ОФК) президенти шайх Салмон бин Иброҳим ал-Халифа 2031 йилги Осиё Кубогига мезбонлик қилишга рекорд даражада — еттита мамлакат қизиқиш билдирганини тасдиқлаб, 2031 ва 2035 йилги мусобақаларга мезбонлик ҳуқуқини биргаликда аниқлашни таклиф қилди.

Австралия, Ҳиндистон, Индонезия, Жанубий Корея, Кувайт, Бирлашган Араб Амирликлари ҳамда Қирғизистон, Тожикистон ва Ўзбекистоннинг қўшма аризаси ОФКга мусобақага мезбонлик қилиш истагини ўтган ойда белгиланган муддатга қадар билдирган.

Шайх Салмон шанба куни Куала-Лумпурда бўлиб ўтган ОФКнинг йиллик конгрессида шундай деди:  

"Мамнуният билан маълум қиламанки, 2031 йилги Осиё Кубоги учун ариза бериш жараёни тарихдаги энг юқори қизиқишни қайд этди — еттита номзод ўз ниятини билдирди. Бу ажойиб қизиқиш Осиё футболи учун ёрқин келажакдан дарак беради ва қизиқиш билдирган барча аъзо ассоциацияларга чуқур миннатдорчилик билдираман".

Осиё Кубоги илк бор 1956 йилда Гонконгда ўтказилган. Ҳиндистон ҳалигача турнирга мезбонлик қилмаган, Жанубий Корея эса сўнгги марта 1960 йилда мусобақани қабул қилган.  

Марказий Осиё мамлакатларидан ҳеч бири — 1994 йилда Совет Иттифоқи парчаланганидан сўнг ОФК аъзоси бўлган давлатлар — ҳозиргача турнир финалига мезбонлик қилмаган.

Ҳозирча ғолиб аризани танлаш санаси белгиланмаган, аммо шайх Салмон 2035 йилги мусобақага ҳам мезбонлик ҳуқуқини бир вақтда аниқлаш имкониятини кўриб чиқишни хоҳламоқда.

"Мен ОФК маъмуриятидан 2031 ва 2035 йилги мусобақаларни қабул қилиш бўйича аризаларни бир конгрессда тасдиқлаш имкониятини ўрганишларини сўрадим. Бу мезбон ассоциацияга тайёргарлик учун кўпроқ вақт беради ва стандартларимизни янада юксалтириш имконини яратади," — деди у.

Осиё Кубоги 24 та жамоа иштирокида ҳар тўрт йилда ўтказилади. Кейинги мусобақа 2027 йилда Саудия Арабистонида бўлиб ўтади.

Қатар 2024 йил бошида — Хитой мусобақани ўтказишдан воз кечганидан сўнг — сўнгги турнирга мезбонлик қилди.