Аргентиналик собиқ ҳужумчи Карлос Тевес OLGA каналидаги подкастда хайрлашув ўртоқлик ўйини ташкил этиш ва ўтказиш нияти борлигини, унга футбол юлдузларини, хусусан, "Манчестер Юнайтед"даги собиқ жамоадоши Криштиану Роналду ва Аргентина терма жамоасининг собиқ шериги Лионель Мессини таклиф қилишга тайёрлигини маълум қилди.

"Хайрлашув ўртоқлик ўйини ўтказиш режаларим бор, фақат тўғри вақт топишим керак. Мен Мессини ҳам, Роналдуни ҳам таклиф қилмоқчиман", деди Тевес.

Тевес 2022 йилда фаолиятини якунлади. Футболчи сифатидаги фаолияти давомида Тевес “Бока Хуниорс”, “Коринтианс”, “Вест Хэм”, “Манчестер Юнайтед”, “Манчестер Сити”, “Ювентус” ва “Шанхай Шенхуа” каби жамоаларда ўйнаган. "Қизил иблислар" таркибида собиқ ҳужумчи Чемпионлар лигасида ғолиб чиқди, Аргентина терма жамоаси билан эса Олимпиада чемпионига айланди.