Миланнинг "Интер" клуби Италия кубоги ярим финалида "Милан"га имкониятни бой бериб қўйди. Чоршанба куни бўлиб ўтган жавоб учрашуви "россонерилар"нинг 3:0 ҳисобидаги ғалабаси билан якунланди. Қарама-қаршиликнинг умумий натижаси - 4:1. Шу тариқа, "Интер" "катта требль" (мамлакат кубоги, чемпионати ва Чемпионлар лигаси) даъвогарлари қаторидан чиқиб кетди. Бу натижани энди фақат "ПСЖ" ёки "Барселона" уддалаши мумкин.

Чемпионлар лигаси ярим финалида парижликлар Лондоннинг "Арсенал" клуби билан, "кўк-анорранглилар" эса айнан "Интер" билан куч синашади.

Эслатиб ўтамиз, "ПСЖ" Лига 1 чемпионлигини аллақачон қўлга киритган. Франция кубоги финалида Луис Энрике жамоаси "Реймс"га қарши майдонга тушади.

"Барселона" Ла Лигада финишга 5 тур қолганида пешқадамлик қилмоқда ва "Реал"ни 4 очкога ортда қолдирмоқда. 26 апрель куни Ханс-Дитер Флик жамоаси Испания кубоги финалида "Реал" билан ўйнайди.