"Барселона" жамоаси ўз таркибидаги энг ёш ва иқтидорли футболчилардан бири — Ламин Ямал билан узоқ муддатли шартнома тузиш арафасида турибди. Хабарларга кўра, футболчи 18 ёшга тўлганидан сўнг, 2030 йилгача амал қиладиган янги шартномани имзолайди.
Бу шартнома унинг ҳозирги 2026 йилгача бўлган келишувини алмаштиради ва клубнинг ёш юлдузига бўлган ишончини янада мустаҳкамлайди. Янгиланган шартнома доирасида Ямалнинг йиллик маоши 7–8 миллион еврога етказилиши кутилмоқда.
Transfermarkt портали маълумотларига кўра, Ламин Ямалнинг бозор қиймати ҳозирда €174,3 миллионни ташкил қилади — бу уни дунёнинг энг қиммат ёш футболчилари қаторидан жой олдиради.
Жорий 2023/24 йилги мавсумда Ямал "Барселона" сафида 50 та учрашувда иштирок этиб, 15 та гол урди ва 24 та голли узатмани амалга оширди.
