"Интер" "Рома"дан ижарага олинган Польша терма жамоаси ярим ҳимоячиси Никола Залевскининг ҳуқуқларини сотиб олмоқчи. Бу ҳақда инсайдер Фабрицио Романо хабар берди.
Футболчи 2025 йилнинг февраль ойидан буён "нерадзуррилар" сафида ижара асосида тўп сурмоқда. Қайд этилишича, ярим ҳимоячининг ўйини Милан клуби раҳбариятида яхши таассурот қолдирган; "Интер" бу футболчини доимий равишда ўз жамоасида кўрмоқчи.
Залевскининг ҳуқуқларини сотиб олиш нархи 6 миллион эврони ташкил қилади. Футболчи аллақачон клуб билан тўлиқ шартнома шартларини келишиб олган.
Ярим ҳимоячи "Интер" сафида 12 та ўйин ўтказиб, битта гол ва битта голли узатмани амалга оширган. "Нерадзуррилар" 77 очко билан А Серия турнир жадвалида иккинчи ўринда бормоқда ва 31 май куни Чемпионлар Лигаси финалида "ПСЖ" билан ўйнайди.
