Ассалом алайкум азиз футбол мухлислари.
Аввалги мақоламда чипта масаласига қисқача тўхталган эдим. Бу сафар терма жамоамиз таркиби ҳақида сўз юритсак. Демак, эртага (мақола кеча эълон қилинган – Std.) Тошкент вақти билан соат 17:00да жамоамиз Жаҳон чемпионати саралашининг сўнгги босқичидаги охирги ўйинда саф тортишади. Рақибимиз - йўқотадиган ҳеч нарсаси йўқ бўлган Қатар жамоаси. Ҳозирда кўпчилик “рақибимиз иккинчи таркиб билан ўйнайди, уларда мотивация йўқ” деб бонг уришмоқда. Аммо баъзи ҳолларда иккинчи таркиб ўйинчилари ўзини кўрсатиш учун ҳам жон куйдириб ўйнайди ва энг асосийси уларда ҳеч қандай босим йўқ. Оддийгина мисол - Япония-Ўзбекистон ўйини.
Аслида босимни ўзимизга-ўзимиз орттириб олдик. Кореядан дурранг билан қайтганимизда ҳозир гуруҳдаги нариги ўйин билан ишимиз ҳам бўлмасди. Энди бўлса Кореянинг ғалабасини сўрашдан бошқа иложимиз йўқ, бор дейсизми? Ҳа, сиз 6-0га шама қилаётган бўлсангиз керак. Лекин бизнинг таркиб бунга тайёрми? Менимча бу саволга жавобни МТЖнинг сўнгги ўйинларини кузатиб борадиган мухлислар билишади. Анчадан бери катта устунликда ғалаба қозонолмаяпмиз. Бунга бир тарафдан ўйинга танланаётган тактика ҳам сабаб. Қосимов эҳтиёткорлик намойиш қилиб минимал ҳисобдаги ғалабани афзал кўрмоқда. Лекин бош мураббийимиз ҳар доим ҳам бундай бўлмаган. Агар ёдингизда бўлса 2009-йилда бундан олдинги Жаҳон чемпионати саралашининг сўнгги турида Тошкентда Қатарни 4-0 ҳисобида тиз чўктирган ҳам шу одам эди. Ўша ўйинда Фарҳод Тожиев бирмас, иккимас нақ учта гол уриб ўзининг катта ҳиссасини қўшган эди.
Қосимов ўтган ўйинда Фарҳодни эртароқ ўйинга тушурмаганини тўғриси тушунолмадим. Қандайдир соддароқ йўл тутди, Гейрних ва Турсунов туширилди (шунда ҳам қандайдир 10-15 дақиқа қолганда). Эътибор беринг, статистикага қарасак, Корея дарвозасини энг кўп ишғол қилган футболчилар шулар экан: бири 3та, иккинчиси 2та. Агар мураббий шу йўлида кетса, демак Тожиев эртага асосий таркибда майдонга тушиши керак. Гарчи Кореядаги қарорга қўшилмасамда, бунисига қўшилмасдан иложим йўқ. Ҳозир ҳужумда энг оптимал вариантимиз бу - Фарҳод Тожиев, у ПФЛда голлар урмоқда, термада ўзини кўрсатишга мотивацияси юқори ва ўта ҳаракатчан. Улуғбекда ҳам шу ҳислатлар бўлган ва ҳозир ҳам қисман бор лекин ёш ва жисмоний жиҳатдан олиб қараганда Бақоев 60 дақиқадан ортиқ ўйнамаслиги керак. Агар Миржалол ака хатолардан тўғри хулоса чиқарган бўлсалар, эртага 2та ҳужумчи билан ўйинни бошлаймиз: Тожиев ва Бақоев. Кўпчилик бунга қарши бориши мумкин, лекин ўйинни бошидан гол уриб олмасак, ўйинни охиригача 4та уёқда турсин, 2та ҳам уролмаслигимиз мумкин. Бунинг учун Ливан ва Гонконгга қарши ўйинларни эслашнинг ўзи кифоя.
Хуллас, 60-дақиқалардан ҳужумда ўзгариш бўлиши керак. Ўйиннинг боришига қараб, албатта. Агар (яна) гол уриш керак бўлса Бақоевнинг ўрнига Баҳодир Насимовни майдонга тушириш тушунарлироқ вариант бўлар эди. Гейнрих охирги марта 2011 йилда ёрқин ўйин кўрсатган, шундан бери майдонда тўғри тўп тепаётганини кўрмадим. Ростини айтсам, уни бир пайтлар кўрсатган ўйинлари учун ҳурмат қиламан, лекин вақти келганда ўринни ёшларга бўшатиб бериш ҳам бир мардлик. Парк Жи Сун агар ўзимиздан бўлганда яна термасида 5-6 йил ўйнарди, лекин 2014 йилги Жаҳон чемпионатини ҳисобга олган ҳолда термадан кетишга қарор қилган. Мана, термаси усиз бирор нарсадан қолиб кетгани йўқ, аксинча ёшларнинг жисмоний устунлиги ҳисобига Ўзбекистонни енгишди ва масалани 95%га ҳал қилишди.
Ҳужум ортида Сервер Жепаровни кўрамиз. Сардоримизнинг ўйинлари ҳам очилмаётган бўлиши мумкин, лекин уни майдонни кўра билиш ва гол сезиш қобилияти фойда бериши мумкин. Орқароқда Одил ва Азиз Хайдаров яхши вариант. Шунда 3-5-2 тактикасини кўришимиз мумкин ва Одилдан иложи борича ҳимояга ҳам ёрдам бериши талаб қилинса ҳимояда етишмовчилик кўзга ташланмайди.
Ҳимоя масаласига келсак, бу схемада одатда 2та марказий ва битта тажрибали ҳимоячи қўйилади. Тажрибали ҳимоячи, одатда, марказда ўйнашга мослашган ва ёнидаги 2 ҳимоячи хатога йўл қўйганда оғир босиқлик билан иш кўра олиш, тўп билан муомала қилганда довдираб қолмайдиган футболчи бўлиши керак. Демак, таҳминимча, 2 ёнда (қанотда эмас) марказий ҳимоячиларимиз Анзур ва Филипосян тўп суради (Шавкат ҳам туширилиши мумкин). Ислом Тўҳтаҳўжаевни эса уларнинг ўртасига жойлаштирилса ҳар холда ишончлироқ ўйин кўрсатади.
Қуйидаги чизмага қараб таҳминан қайси футболчилар қандай жой олишини билиб олса бўлади:
Сизлардан ҳам таҳмин ва фикрларингизни кутиб қоламан! Эртанги ўйинда жамоамизга омад!
